[A:245a]tshogs kyi 'khor lo la dgyes par rol/ der sang nas sa chog gnangs sta gon zhag gsum pa dngos gzhi mdzad pa'i dkyil 'khor bstan pa'i dus/ 'dir mtshon byed dpe'i dkyil 'khor yin/ mtshon bya don gyi dkyil 'khor 'di na zhes bar snang la dpal 'khor lo sdom pa drug cu rtsa gnyis kyi dkyil 'khor rten brten par bcas pa mngon sum du bzhugs pa mjal/ gsang mtshan 'dogs pa'i dus sa gsum gyi mkha' 'gro ma nam mkha'i sprin phung tsam gyis mgrin gcig tu bzhad pa'i rdo rje zhes btags so/ /dbang gong ma gnyis kyang dngos dbang du mdzad/ dbang dus su dpe'i ye shes gzigs pas 'jig rten chos mchog gi rtogs pa brnyes pa yin gsung / de nas brtsams te dgyes pa rdo rje/ ma hA ma yA/ gdan bzhi/ sangs rgyas thod pa/ gsang ba 'dus pa/ de dag gi rgyud rgyud 'grel dbang sgrub thabs rim pa gnyis/ don mthar thug ston pa'i snying po skor/ khyad par khyad chos bsre 'pho gnad kyi mtshams sbyor la smar khrid du mdzad/ lho brag stag nya'i brag la sgom du bcug go /tshar gcod la lo bzhi/ rjes 'dzin mdzad nas lo gnyis dang zla ba brgyad bzhugs/ lo tsam bzhugs rgyu'i nang la mkha' 'gro snyan rgyud kyi gdam ngag gnang / dpal nA ro pas mdzad pa lta bu'i tshogs kyi 'khor lo dgyes pa'i rdo rje la brten nas mdzad pas/ mes rngog 'tshur mi la mgo yags la sogs thams cad kyis dgyes rdor sprul pa'i lha dgu dngos su gzigs/ gzhan bde mchog 'khor lo la sogs pa'i yi dam du mar snang ba/ zad par sa la sogs pa'i rdzu 'phrul/ grong 'jug mdzad pa la sogs che ba'i yon tan sangs rgyas dang mnyam par gzigs pas/ ci gsung ba'i bka' la skad cig kyang mi 'gong ba'i dam bca' mdzad de/ pha sku drin can gyi zhabs drung du/ /lo drug zla mthong brgyad du bsdad/ /lus dang grib ma bzhin du 'grogs/ /nor zang zing gi 'bul ba ma mchis te/ /lus kyi zhabs tog rdul du brlag /dang / thugs gting nas mnyes pa'i gnad ka des/ /rgyud zab mo dgyes pa'i rdo rje dang / /byin rlabs can gyi bde mchog dang / /snying po mahA ma yA'i rgyud/ /dpal nam mkha' lta bu'i gsang 'dus dang / /bka' srung can gyi gdan bzhi dang / /sprul pa sangs rgyas thod pa'i rgyud/ /don mthar