[A:༡༦]གནང༌། ཟུར་པོ་ཆེ་ཤག་འབྱུང་ཡང་དགའ་ནས། བླ་མ་ཆེན་པོའི་བཀའ་དྲིན་གྱིས། །ཨ་པོའི་སེམས་ཕྱོགས་ནོར་དུ་ཐལ། །ཟེར་ལོ། །དེར་བླ་མ་ག་ཡ་དྷ་ར་ལ་གསེར་སྲང་ལྔ་བརྒྱ་དུས་གཅིག་ལ་ཕུལ་བས་ཐུགས་མ་ཆེས་པས་སྒྱུ་མ་ཡིན་ནམ་དགོངས་ཏེ། ལམ་ཁར་མང་ཀར་དྲིལ་ཆེན་གྱི་མི་མང་སར་བྱོན་ཅིང་འདི་རྣམས་གསེར་དུ་འདུག་གམ་མི་འདུག་གསུང་ཞིང་བསྟན། དེ་དག་གསེར་ཡིན་པར་དགོངས་པ་དང༌། ཤིན་ཏུ་དགེས་པས་ད་ཁྱོད་ཅི་དགའ་བར་བྱའི་ཅི་འདོད་གསུངས། ཅི་ཡང་མི་ཞུ་གསུངས་པས། ཡང་ཡང་གསུངས་ནས། འོ་ན་གསུང་ངག་འདི་གཞན་ལ་མི་གསུང་བར་ཞུ་བ་ཕུལ། བླ་མས་ཞལ་གྱིས་བཞེས་ནས་རྒྱ་གར་དུ་གཤེགས། ཡང་དུས་ཕྱིས་འགོས་ཀྱིས་གྲོ་མོ་ན་ཚུར་མེ་ཏྲཱི་པ་ཡིན་གསུངས་ནས་སྤྱན་དྲངས། བོད་དུ་བྱོན་པས་མེ་ཏྲཱི་པ་མིན་པར་འདུག་པས། བླ་མས་བརྫུན་གསུངས་བྱས་པས། མེ་ཏྲཱི་བས་ཆོས་ནི་ང་མཁས་ཁྱོད་ཆོས་འདོད་པར་འདུག་པས་དེངས་དགའ་མོད་གསུངས། དེར་འགོས་ཀྱང་ཆོས་ལ་མགུ་བས་བསྙེན་བཀུར་ཡང་མང་དུ་བྱས་རྒྱ་གར་དུ་གཤེགས་སོ། །ཡང་དུས་ཕྱིས་ཀྱི་ཇོ་ཟླ་བའི་འོད་ཟེར་གྱིས་མངའ་རིས་སྟོད་ནས་སྤྱན་དྲངས་ནས་བསྙེན་བཀུར་མང་དུ་བྱས་ནས་རྒྱ་གར་དུ་གཤེགས་པའི་ལམ་ཁར་གྱི་ཇོའི་སློབ་མ་ཁ་རག་གཙང་པས་སྤྱན་དྲངས་ནས་ཁ་རག་ཏུ་བྱོན་ནོ། །ཁ་རག་པས་བསྙེན་བཀུར་མང་དུ་བྱས་ནས་དེར་སྐུ་འདའ་ཁར་ངའི་བུ་ཚ་བོ་རི་རྩེ་ལ་ཡོད་པས་དེར་སྐྱོལ་གསུངས། བུ་ཚ་བོ་བདག་ཅག་ཀྱང་ལགས་ན་བྱས་པས། དེས་མི་ཕན་སྐྱོལ་གསུངས། དེ་བླ་ཆེན་གྱིས་སློབ་མ་སྒོམ་ཆེན་སེ་རོག་གཉིས་ཅན་དུ་བཞུགས་ནས། བུ་སྒྲུབ་པ་ལ་ནན་ཏན་མ་ཆུང༌། ངས་མ་བསྒོམས་ཀྱང་སྔགས་པ་འཆི་ན་འདི་བཞིན་ཡིན་གསུངས་ནས། རྡོ་རྗེ་དྲིལ་བུ་ཕྱག་ཏུ་བསྣམས་ནས་འོད་རིལ་བ་ཙམ་ཞིག་སྤྱི་གཙུག་ནས་འཐོན་ནས་སོང་གསུངས། ད་ལྟ་ཡང་ཐོད་ཕུུ་ན་རྡོ་རྗེ་དྲིལ་བུ་ཡོད་དོ། །བླ་ཆེན་འབྲོག་མི་ཉིད་གཞུང་གསུངས་པའི་སློབ་མ་ལ་མན་