[B:58b]las byung ba'o/ / de'i steng na rdzu 'phrul gyi rkang pa bzhi'i snang brnyan bang rim gsum pa'i phyogs bzhi'i dbus kyi bab le'i khyims rnams la/ dpal rigs thams cad bsdus pa'i kye rdo rje'i phyogs bzhi'i mkha' 'gro ma chos thams cad mngon sum du gcig car gzigs pa'i [A:195]spyan dang ldan zhing / sangs rgyas rtag pa'i lhan cig spyod pa mo rdo rje spyan ma dang / shes rab mchog gi rin po che'i sgron ma rab tu 'bar bas mi shes pa'i mun pa'i gdung ba rtsa nas drungs phyungs ba mo/ yan lag bdun gyi shing rtas legs par drangs nas 'khor 'das kyi gnas kyi gnas thams cad du 'od zer stong gi phreng ba 'khrigs pas bdud dang bdud kyi phyogs su gyur pa'i skar ma'i 'od mi snang ba dang / nyon mongs pa'i 'dam skem pa dang / las kyi mun pa ring song ba med par bcom pa ste/ khyad par du ma dang ldan pa rdo rje nyi ma'i dpa' bo mchod pa'i dpal mo rin chen sgrol ma dang / padma'i rtsa ba dang dung dang kunda ltar dkar ba'i bla gos dang / sham thabs lhab lhub rnam par g.yo ba'i mtshan can rdo rje rig ma bcu drug lon pa'i lang tsho can/ bde ba chen po mchog gi rol rtsed chos kyi dbyings ma lus shing lus pa med par rgyas par 'gengs pa'i gar mkhan ma padma rA ga'i 'od ris can padma gar dbang mchod pa'i gzhon nu ma na bza' dkar mo dang / 'khor ba dang mya ngan las 'das pa'i phyogs su lhung ba'i chu bo chen po las [A:196]sgrol ba'i thugs rje tshad med pa'i gru mkhan ma/ mtho ris gnyis pa'i gzhon par bsngags pa rta mchog rnam par bzhad pa'i zhal can rdo rje rta rgyal dgyes pa'i dbang mo dam tshig sgrol ma rnams kyi lag rtags bdud bzhi'i khrag gsar pa'i rgyun 'dzag pa'i rdo rje gri gug gis brgyan pa/ de dag gi g.yas g.yon gyi bab le'i khyim du shes bya'i dkyil 'khor ma lus pa'i gzugs brnyan ma 'dres par 'char ba'i ye shes kyi me long dam pa dang / dug gsum gyi nad rtsa ba nas sel ba'i lung dang rtogs pa'i chos kyi sman 'gi'u wang gis gang ba'i rin po che'i phor bu dang / bde ba chen po mchog tu mi 'gyur ba'i bcud kyi snying po zhos gang ba'i padma bhAnydza