[A:323]bzhin nad kyang 'khrus pa na/ 'pho ba 'debs par bdag gi bla ma thugs rje chen po 'di spyan drangs pa'i tshe/ de tsam la'ang ma thug gi gsungs nas/ dpal nag po chen po dpa' bo gcig pa'i rjes su gnang ba zhig mdzad de/ ye shes phab tshar tsam la/ lus kyi mdangs rnyed cing dbugs dal gyis song nas/ zas skom gyi bzhed pa cung zad dang ldan par gyur de nas rim gyis sku zungs gong 'phel du gyur te/ 'chi bdag gi chad pa las grol nas/ de phyin chad kyang lo bcu'i bar zhabs brtan par bzhugs te/ 'di na sems can gcig gi tshe zad na/ /sangs rgyas stong gis mi thub zer ba brdzun/ /nges par 'chi bdag kha ru song zin pa/ /slar yang yun ring 'tsho ba 'di la ltos/ /'on kyang rgyal ba'i dbang po ji snyed pa/ /de dag kun gyi thugs rje ji tsam zhig /re res grangs med 'gro ba skyob nus na/ /gcig tu 'dus tshe mi skyob ci zhig yod/ /bdag kyang las ngan pa'i rgyus bskyed pa'i phung po 'di sngon bzod pa ma bgyis pa'i 'bras bus dus su smin pa bzhin na ba kho na gnas pa zhig yod la/ khyad par lo bcu dgu pa'i tshe zla ba drug nad kyis sbyangs pa'i mthar/ 'gum pa la mngon du phyogs pas/ sman pa mkhas pa zhig gis rtsa bltas te cang mi smra bar bdag la bltas te shugs nar zhes byed cing mchi ma phyung nas song la/ nang du yang chu me la thim pa'i rtags rnams shar ba na/ nye 'brel thams cad rtab rtab por gyur nas/ bdag gi bla ma 'chi bdag gi dpung 'joms pa 'di spyan drangs nas/ sngas mgor bzhugs te/ nged la legs par ltos la