[A:298]de dag dus mthar byed pa'i dpa' bo rnams/ /sdig med sa lam mang po cig car rdzogs/ /e ma sems 'di'i byed pa ma lags sam/ /de ltar tshul de lta bus bdud kyi dkyil 'khor nyams par byas pas phyogs de bde skyid ldan zhing sgrub pa zab mo mchog tu 'phel bar gyur mod/ sku 'bum pa zhes bya ba'i ma rungs pa des sde chen po 'ga' zhig la brten nas/ ri khrod jo nang 'joms pa'i thabs du ma la zhugs pa gsan pa na rgyu de las ngan pa de yun ring por bde ba thob par 'gyur snyam du dgongs nas mngon spyod kyi thugs dam cung zad mdzad pa na/ dmu rgod de kha nas khang khrag dron mo skyug cing / nag po chen po'i rnam par 'phrul pa'i bya nag khyi nag la sogs pas bsdigs pa'i snang ba mngon sum du shar te 'gyod cing skrag bzhin pa'i ngang nas las ngan pa'i dbang gis thob pa'i lus de skad cig la bor nas/ rnam shes rdo rje mi bskyod pa'i zhing du yud kyis song bar gyur to/ /'di na nam yang zhi bas mi 'dul ba/ /de dag tshul 'dis rjes su mi 'dzin na/ /thugs rjes lhag pas phyug pa'i rgyal ba rnams/ /khro bo'i dbang por bzhengs pa'i dgos pa ci/ /brtse ldan khyod kyi mthu stobs dus mtha'i mes/ /sdig pa'i nags tshal stug pos sbags pa'i sems/ /mi gtsang lus dang lhan cig bsregs gyur pa'i/ /skye bo de yang mchog tu skal ba bzang / /de'i tshe gsung las/ sku 'bum pa khos zag pa mang po bsags te nga rang gi sngon gyi las ngan zhig gi 'bras bu yin yod snyam/ bzlog 'khor la skyon pa tsam yang ma byas/ phyis khos jo nang la me rgyag zer ba thos pas de ltar na khong rang yang las