[A:296]nas nag po'i phyogs rnams cher 'khrugs pas nye bar bslad pa'i nye gnas kha cig gi bu lon gyi brgya 'bul dang / rtsis log rgya 'dre'i bsnyen bkur ni yang yang byed/ zhe ma zhim ngan g.yo khram gsum gyi dkor mang po'i nus pas sku 'bum pa dkon cog bzang po la sogs pa bsod nams dman zhing mnar med pa'i dmyal ba chen por rings par chas pa/ dam pa'i chos kyi 'phros thos na bong rgan gyi mgo la phad rdo bsnun pa ltar 'gyur la/ chos khrims dang spyi khrims bshig pa dang / spyi nor la ni bya rgod ltogs pa ro la rngam pa bzhin stobs sha 'gran par brtson pa kha cig gis glags lta bar sems pa las skabs rnyed de/ dam pa'i chos kyi 'khor lo bskor ba'i bar chad du 'os pa de dang / de dag nan tan du bsgrubs shing / rnam par mi 'tsham pa'i bya ba kham po che du mas thugs dkrugs kyang / sems dpa' chen po 'dis bzod pa'i pha rol tu phyin pa rdzogs pa'i thabs su mkhyen pas mi dgyes pa ci yang med par de dag la dngos dang brgyud nas lam ngan pa las bzlog cing / 'phral phugs su phan bde 'byung ba'i thabs kho na mdzad mod/ ma rung pa de dag zhi bas 'dul bar mi 'os pa zhig pas cung zad kyang phan par ma gyur cing / slar nag phyogs la dga' ba'i sde chen po 'ga' zhig gis kyang de dag gi grogs byas te gnod pa cher bsgrubs pa na bdag nyid kyi 'khor dang longs spyod la sogs par chags pa mi mnga' zhing / gzhan la gnod pa chung ngu yang thugs kyis mi bzod pas khong rang ci dgar byed du bcug gi gzhan du na rdo rje chos skyong rnams bran bzhin du 'khol ba 'dis thugs khros pa tsam gyis ma rungs pa de dag skad cig la